चोपाया लोग लुगायां, अंजळ बिन बुरा हाल ॥1॥

अंजळ बिन बुरा हाल, काळ रूप विकराळ ।

मरु बासी जाबा लागा, मेवात काळ टाळ ॥2॥

जांगळ जांभजी भेँटिया, कीनी बात बिमरस ।

मरू छोड़ जावंता नै, बंधायो मन थावस ॥3॥

जांभजी अलौक शक्ति सूं, दीन्होँ अन्न अथाह ।

मरता जीव बचाविया, मे-ह ने-ह बरसाह ॥4॥

समराथल हरि आविया, आवि सगळी जमात ।

जांगळ धणी जाम्भजी, भाख्यी परम बात ॥5॥

मरु रा पांथा बदळसी, प्रे-म ने-म संचार ।

जांगळ जज्ञ जाम्भजी, थरप कळस दातार ॥6॥

पावन पथ परचावियो, पहलादे वाचा श्याम ।

पाहळ पाणी देवियो, जोय विष्णोइ नाम ॥7॥

बाविस अरु सात नेम, विष्णोइ पंथ आधार ।

इणि नेमा नेम राखो, ए-ह जीवन सार ॥8॥

विसन् रसाळो रूँखड़ो, निपजै इमरत फळ ।

रसाणा रसाळा भाख्या, आवागवण नी भळ ॥9॥

जीव दया हिरदे धरो, धरो प्रे-म रो ने-म ।

शमी मिरघे हित सदा, राखो जीवन ने-म ॥10॥

बाद-विवाद क्रोध लोभ, त्यागो मन अभिमान ।

जीयां जुगति मुवा मुक्ति, हालो गुरु फरमान ॥11॥

प्रे-म ने-म परचावियो, जगत जाम्भजी राय ।

 प्रेम ने-म सिर धारियो, विष्णोइ जन समुदाय ॥12॥

सोवण गांव गुणावंती, साल्हिया हुया दोय ।

विष्णोइ पथ चालतां, मरतां मोख होय ॥13॥

प्रे-म ने-म ने राखता, आवि विपदा हेक ।

करमा गौरा देह हित, बचाया व्रख अनेक ॥14॥

क्रमा गौरा रो गौरव, व्रखां सूं घणो ने-ह ।

कल्प बिरछ रे होवंता, होवण लागो मे-ह ॥15॥

खीँ-व-णी मो-टा ने-तू, रूँखा रलि निर्वाण ।

जाँभेजी जिभिया जपतां, परम पद प्रमाण ॥16॥

सतरा सै सवंता बरिष, चैत तीज तिथि जाण ।

खेजड़ियां रे हित खड्यो, बूचो भगत महान ॥17॥

व्रख प्रीत पंथ यूँ पळी, देह देय व्रख राख ।

मरू मांही विष्णोइ जन मरू तरु री साख ॥18॥

दोय सदी पछे आरण, हुयो रूँखा री त्राण ।

आत्मदळ व्रखां दुःख सह्यो, जाम्भेजी री आण ॥19॥

अमरता बाई जावतां, धारियो आरण्य रूप ।

बिरछ प्रेम दरसावियो, जग अमरता अनूप ॥20॥

बन रा जीव जिनावर, इणा सूं घणो ने-ह ।

विष्णोइ जीव बचावतां तज दे आपण देह ॥21॥

चूनो चिमन गंग निहाल भीँयो अर्जन शैतान ।

बीरबल हजारी गंगो, मिरघे तणो तन दान ॥22॥

अरब देसां सूं आयो, खेलण शिकार सेख ।

जैसाणे धरा विष्णोइयां, राख्यो गोडावण देख ॥23॥

रामा सारद परमेसरी, जसोदा जेड़ी माय ।

कृष्णसार एह पाळियो, आपण दूध पिलाय ॥24॥

गाय अरु बेल राखता, खड्या सात अरु बीस ।

चिन्दड़ धरा विष्णोइयां, ध्यावे आपण ईश ॥25॥

जोरे जेड़ो जोध जय, हुयो न होसी ओर ।

सुन्दे खां जुल्म भूल्यो, करतब कीन्होँ जोर ॥26॥

मरू तरु जीव जिनावर, गाय सूं घणी प्रीत ।

विष्णोइ जन पावन पंथी, निभावे विरली रीत ॥27॥

विष्णोइ जन विष्णु सेवक, प्रगति रा बनमाळी ।

रातां जगमग चानणो, तारा री रूखाळी ॥28॥

केवे किसनो चित लाय, प्रे-म ने-म सुख होय ।

जग प्रे-म ने-म पसारे, विष्णोइ धरम जोय॥29॥